Comisiones Obreras de Asturias

Comisiones Obreras de Asturias
CCOO de Asturies

sábado 2 de noviembre de 2019

Situación del profesoráu de llingua asturiana

  • CCOO sollerta de la precariedá y de unes condiciones de trabayu úniques y desfavoratibles que-yos impiden algamar la estabilidá llaboral

El sindicatu d"enseñanza de CCOO d"Asturies acaba de presentar un informe sobre la enseñanza de la Llingua Asturiana y el Gallego-asturianu, qu’incluye una denuncia de les males condiciones llaborales qu’afecten al profesoráu d’estes asignatures y una decena de propuestes que diben permitir tornar esta situación dientro’l marcu llegal vixente.

El profesoráu de Llingua Asturiana y Gallego-asturianu (un colectivu d’unes 350 persones) ye personal interino nun 90% de los casos.  La proporción de medies xornaes nel sector ye mui alta: en Secundaria, el cursu pasáu, les xornaes completes nun llegaron al 40% y esti añu la tendencia espardióse a la Primaria. La temporalidá d’estos trabayadores ye forzosa, porque son los únicos que nun tienen oposiciones, al nun tar reconocíes les especialidaes d’Asturianu y Gallego-asturianu a nivel estatal. Estes condiciones llaborales espliquen en gran parte la falta de profesoráu que se ta dando nos últimos cursos escolares. Amás, repercuten sobre’l procesu d’escolarización, ya que los centros nun tienen docentes en plantía pa dar continuidá a los proyectos educativos. La propuesta fundamental de CCOO consiste en regular les especialidaes de Llingua y Gallego-asturianu col aquel d’gualar al profesoráu d’estes asignatures col de les demás materies.

L’asturianu empezó a dase na enseñanza reglada nel cursu 1984, per aciu d’un programa qu’afectaba a 6 centros d’EXB. La esperiencia nun s’estendió a les enseñances medies (al BUP) hasta’l cursu 1988-1999. Anguaño, ufiértase asturianu en casi tolos colexos públicos d’Educación Primaria (99,01 %) y en gran parte los colexos concertaos (82,69%). Na zona onde se fala gallego-asturianu, estúdiase en 17 de los 19 colexos públicos esistentes. L’alumnáu de Primaria escueye ente dar Llingua Asturiana/Gallego-asturianu o dar Cultura Asturiana, ya que l’estudiu d’estes llingües, d’acordies col Estatutu d’Autonomía d’Asturies, ye voluntariu. Les cifres de matriculación en Llingua Asturiana son del 40,45%, anque na enseñanza pública suben al 50,05%.

Nos institutos, ufiértase Llingua Asturiana nel 92,8% de los casos y Gallego-asturianu, nel 50%. Na rede concertada, en cambiu, namás se da Asturianu nel 61,53% de los centros. La matrícula ye enforma más pequeña qu’en Primaria: namás el 11,66% del alumnáu de la ESO estudia Llingua y nun llega al 10% la proporción d’alumnáu que va a clase de Gallego-asturianu. En Bachilleratu, tien una presencia testimonial:  afecta namás al 4,23 % del alumnáu de la enseñanza pública. Tanto na ESO como en Bachilleratu, la Llingua Asturiana y el Gallego-asturianu son asignatures optatives qu’entren en competencia con materies relevantes como la segunda llingua estranxera. Esta organización, onde se confunde voluntariedá con optatividá, frenó la implantación de la materia en Secundaria dende’l primer momentu, ya que, nunos casos, obliga al alumnáu de Llingua a renunciar a asignatures importantes pa la so formación y n’otros casos, priva a los estudiantes de recibir enseñances na llingua propia como marca la llei.

L’analís de los datos enseña una escolarización en crisis (la matrícula baxó más del 14% en Primaria y algo más del 8% en Secundaria na década última), afectada por problemes de falta de profesoráu, llibros de testu y materiales pal aula, qu’arrastra problemes estructurales, como ye la dificultá pa estudiala en Secundaria o la imposibilidá d’aprendela, na mayoría los casos, n’Educación Infantil.

Del informe ellaboráu pol sindicatu d’enseñanza de CCOO d’Asturies conclúyese que’l procesu d’escolarización diseñáu pola Conseyería d’Educación pal asturianu y el gallego-asturianu nun garantiza’l cumplimientu de la Llei 1/1998, qu’afita’l derechu al aprendizaxe voluntariu d’estes llingües en toles etapes educatives, al tiempu que discrimina a los docentes d’estes materies, sometiéndolos a unes condiciones de trabayu úniques y desfavoratibles que-yos impiden algamar la estabilidá llaboral.

 

Situación del profesoráu de llingua asturiana

sábado 2 de noviembre de 2019

Áreas temáticas relacionadas

Áreas - AREA EXTERNA Organización, Comunicación, Elecciones Sindicales y Afiliación